Մեր սրբարար Մեծ Պահքի շրջանն է, որը լի է հոգու խորը ապրումներով։ Այս ժամանակահատվածում, որը նախատեսված է զղջման և ապաշխարության ճանապարհով ընթանալու համար, մեր մտքերը և սրտերը ուղղված են դեպի մեր Փրկչի Սուրբ Հարությունը։
Այս կարևոր մտքերը հստակ արտահայտված են Գարեգին Բ ամենայն հայոց կաթողիկոսի՝ Մեծ Պահքին նվիրված ուղերձում։ Նրա խոսքերով, մեր Տեր Հիսուս Քրիստոսի քարոզչությունը սկսվեց ապաշխարության կոչով, որը հնչում է այսպես․ «Ապաշխարեցե՛ք, որովհետև երկնքի արքայությունը մոտեցել է» (Մատթ. 4.17)։ Պահքը, որպես աղոթական իր խորհրդով զորացնող ու մաքրագործող գործընթաց, հենց այս հրավերի ընդառաջումն է, որ ամրացնում է մեր որդիական կապը Երկնավոր Հոր հետ։
Ջերմեռանդ աղոթքը պիտի լուսավորի պահեցողության ընթացքը, իսկ մեր կենցաղավարությունը պետք է զարդարի չափավորությունը։ Զղջացող հոգին պետք է դրսևորի ներողամտություն իր նմանի հանդեպ, ինչպես որ Տերը հորդորում է․ «Ներեցե՛ք, որպեսզի ձեր Հայրն էլ, որ երկնքում է, ների ձեզ ձեր հանցանքները» (Մարկ. 11.25)։
Մեր օրերում, երբ ազգային և հայրենական կյանքի խնդիրների, ինչպես նաև մեր Սուրբ Եկեղեցու դեմ տարատեսակ հարձակումների մտահոգություններով ալեկոծ են մեր հոգիները, խաղաղություն գտնենք մեր Տեր Հիսուս Քրիստոսով, Ում միջոցով հաշտվեցինք Աստծո հետ։
Ապրենք ազգի ու հայրենիքի նկատմամբ ամենայն նվիրումով, մեր ինքնությանն ու սրբազան արժեքների հանդեպ անբեկանելի նախանձախնդրությամբ, մեր Մայր Եկեղեցուն հավատարիմ մնալու հաստատակամությամբ։ Աղոթենք միասին, որ պահեցողության խորհրդավոր այս ժամանակամիջոցը համընդհանուր զղջման և ապաշխարության գեղեցիկ առիթ լինի ամենքիս համար։ Թող մենք կարողանանք միասնաբար հաղթահարել բոլոր նեղություններն ու դժվարությունները՝ մեր սխալներն ու թերությունները գիտակցելով և շտկելով։
Թող Բարձրյալն Աստված խաղաղություն հաստատի աշխարհում, մեր հայրենիքում և մեր սրտերում, և բարօրության ու շինության մեջ պահի ու պահպանի մեր ազգը, մեր պետությունն ու մեր Սուրբ Եկեղեցին։
